Bwletin Ward Talysarn
Hydref – Rhagfyr 2005
Dewisiwch un o'r is-deitlau isod er mwyn ymweld â'r
pwnc priodol:
1. Pobl Ifanc yn Lleisio Barn
2. Talysarn Celts
3. Llys Llywelyn
4. Cyfarfod Cyhoeddus Cymunedau'n Gyntaf
5. Pobl Ifanc
6. Datblygiad y Barics
7. Heddlu Gogledd Cymru
8. Ethol Aelodau
9. Gwerthusiad Lleol
10. Canolfan Gymdeithasol Talysarn
11. Clwb Silyn
12. Hyfforddiant
13. Dyddiadau Cyfarfod y Bartneriaeth 2006
Pobl Ifanc yn Lleisio Barn
Yn ddiweddar gwnaethpwyd arolwg ar drafnidiaeth cyhoeddus
gan Grwp Barn Pobl Ifanc Gwynedd sydd yn cynnwys 7 o
bobl ifanc o Dalysarn a Nantlle. Cyflwynwyd yr adroddiad
terfynol i aelodau Fforwm Ieuenctid Gwynedd yng Ngwesty’r
Celtic Royal Caernarfon gan Darryl Hughes, Cai Thomas
a Donna Pritchard o Dalysarn.
Llongyfarchiadau i Darryl am gael ei ddewis i gynrychioli
Gwynedd i adrodd yn ôl yn fisol i’r Fforwm
ac i Cai a Donna fel eilyddion.
Cynhaliwyd diwrnod arbennig yn Nhalysarn a Nantlle gan
ein pobl ifanc er mwyn arddangos y gweithgareddau maent
yn eu datblygu. Roedd y diwrnod yn gyfle hefyd i gasglu
gwybodaeth a syniadau pobl ifanc fel rhan o’r Gwerthusiad
Lleol mae’r Bartneriaeth yn ei wneud.
[ Yn ôl
i'r Top ]
Talysarn Celts
Pwy ddywedodd "you won’t win anything with
kids"?
Mae tîm pêl-droed y Celts yn dal eu tir eleni yng nghynghrair Safeflue
Caernarfon a’r Cylch.
Gyda 5 aelod o’r tîm dan ddeunaw oed, mae’r
dyfodol yn edrych yn ddisglair iawn. Mynd am y trebl
tymor nesaf!!!
Da iawn am roi cyfle i’r hogia ifanc sef Brian
Page, Rhys Jones, Scott Hughes, Peter Bridges a David
Jackson.
[ Yn ôl
i'r Top ]
Llys Llywelyn
Yn ystod y tri mis diwethaf yn unig cafwyd beth wmbredd
o weithgareddau, gan gynnwys: Boreau Coffi, Llyfrgell
Llys Llywelyn, Clwb Diddordebau Hamdden, Partïon
Penblwydd, Dosbarthiadau Ioga, Tê P’nawn
( a gweithgareddau eraill Blodeuwedd – diolch yn
fawr iddyn nhw), Clwb yr Iard, Ffair Hydref, Cyfarfod
Cyhoeddus, Brecwast Priodas, Ffair Nadolig, Dosbarth
Trefnu Blodau, Noson o Garolau. Bu rhain i gyd yn llwyddiannus
iawn, ac mae’n rhyfeddol bod pentref mor fychan
a Nantlle yn medru cynnal cymaint o weithgareddau. Mae
pentrefi llawer iawn mwy gyda Neuadd Bentre fwy o lawer,
sy’n methu cynnal hanner cymaint o weithgareddau.
Diolch i bawb fu’n cefnogi.
Yn y flwyddyn newydd rydan ni’n bwriadu ehangu
ein gweithgareddau. Cofiwch y bydd Byrddau Gwerthu Dan
Do yn dechra mis Ionawr. Hefyd, mae Cymdeithas Addysg
y Gweithwyr yn awyddus i gynnal cyrsiau yma. Dyma’r
math o gyrsiau mae nhw’n eu rhedeg mewn pentrefi
eraill: Arlunio i Bawb, Sbaeneg, Ffrangeg, Cyfrifiaduron
i Ddechreuwyr, Cymraeg i Rieni, Ffotograffiaeth Digidol,
Celf, a beth wmbredd o rai eraill. Mae rhai o’r
rhain yn digwydd yn y bore, eraill yn y p’nawn,
a rhai eraill gyda’r nos. Bydd yr arian rydan ni
wedi ei sicrhau yn ddiweddar i brynu cyfrifiaduron ac
offer technolegol eraill yn gymorth i gynnal rhai cyrsiau
o’r math yma.
[ Yn ôl
i'r Top ]
Cyfarfod Cyhoeddus Cymunedau'n Gyntaf
Cynhaliwyd Cyfarfod Cyhoeddus llwyddiannus iawn yn Llys
Llywelyn nos Lun 14 Tachwedd 2005.
Ar ôl cyflwyniad y Cadeirydd a’r Cydlynydd
yn adrodd yn ôl i’r gymuned am yr hyn sydd
wedi datblygu dros y chwe mis diwethaf aeth y cyfarfod
ymlaen trwy ddilyn yr agenda.
[ Yn ôl
i'r Top ]
Pobl Ifanc
Pobl ifanc wedi gosod arddangosfa lluniau o weithgareddau
pobl ifanc sydd wedi datblygu yn yr ardal gyda chefnogaeth
Cymunedau’n Gyntaf.
Cafwyd cyflwyniad gan Darryl Hughes o’r hyn sy’n digwydd i roi
cyfle i bobl ifanc yn yr ardal.
Trwy ddefnyddio "Power Point" ar gyfrifiadur,
cawsom weld beth mae Clwb yr Iard wedi datblygu.
[ Yn ôl
i'r Top ]
Datblygiad y Barics
Manteisiodd Antur Nantlle ar y noson i geisio casglu
gwybodaeth a chefnogaeth y gymuned gyda’u hymdrechion
i ddatblygu’r Barics fel atyniad.
Roedd mwyafrif yn cefnogi datblygu y safle fel atyniad ar sail themau penodol.
Beth mae’r darllenwyr yn feddwl?
Cysylltwch â Dafydd Glyn Owen ar 01286
882688 neu galwch yn swyddfa Antur Nantlle
ym Mhenygroes / Swyddfa’r Bartneriaeth yn Nhalysarn.
[ Yn ôl
i'r Top ]
Heddlu Gogledd Cymru
Roeddym yn ddiolchgar dros ben o glywed gan Inspector
Gareth Roberts bod newidiadau ar y gweill ym mhlismona
ein cymunedau. Yn ôl Inspector Roberts bydd plismon
yn cael ei benodi i fod yn gyfrifol am bob ardal yn y
Dyffryn gyda Dylan Owen a Stephen Nesfield yn gyfrifol
am Talysarn a Nantlle.
Bydd yr heddlu yn anfon cynrychiolydd i gyfarfodydd
y Bartneriaeth er mwyn i’r gymuned gael y cyfle
i leisio barn a chydweithio.
[ Yn ôl
i'r Top ]
Ethol Aelodau
Etholwyd 2 aelod newydd ar y Bartneriaeth sef Julie
Rathbone a Peter Barnes, a 3 person ifanc ar Is-Grwp
Pobl Ifanc y Bartneriaeth.
[ Yn ôl
i'r Top ]
Gwerthusiad Lleol
Adroddodd Catrin Meirion yn ôl i’r gymuned
y canlyniadau o’r holiaduron a ddosbarthwyd yn
yr ardal yn ddiweddar. Roedd y wybodaeth a gasglwyd yn
rhoi arweiniad a phenawdau pendant mae’r gymuned
yn awyddus i weld datblygiad. Mwy o wybodaeth am hyn
gan Catrin Meirion yn swyddfa’r Bartneriaeth neu
cysylltwch ar 01286 881103.
Ennillwyr y gwobrau am lenwi’r holiaduron oedd:
1. £50 - 409 Mr B Jones 13 Bro
Silyn, a roddodd rodd i Ysgol Feithrin Talysarn.
2. £30 - 510 Mr S Owens 12
Maes Llyfnwy
3. £20 - 495 Mr D G Owen 10
Ffordd Coedmadog Talysarn, a roddodd ei enillion
i Glwb Silyn.
[ Yn ôl
i'r Top ]
Canolfan Gymdeithasol Talysarn
Mae Canolfan Gymdeithasol Talysarn newydd dderbyn £63,000
o arian Cymunedau’n Gyntaf er mwyn rhedeg y Ganolfan
hyd at Mawrth 2008.
Yr ydym yn ddiolchgar iawn am gefnogaeth Partneriaeth Talysarn a Nantlle am
sicrhau’r arian yma ar ein rhan. Fe fydd yr arian yn ein gallu i gyflogi
dau berson rhan amser i redeg y ganolfan, talu costau rhedeg am y blynyddoedd
nesaf a hyrwyddo a datblygu gweithgareddau ar gael i’r gymuned.
Dywedodd Tom Coleman, aelod o’r pwyllgor "mae’r
adeilad yn cymeryd siap erbyn hyn a’n gobaith yw
y bydd yn barod i bobl ei ddefnyddio erbyn diwedd Chwefror
2006". Mae’r adeilad wedi ei gynllunio gyda
mynediad a thoiledau anabl.
[ Yn ôl
i'r Top ]
Clwb Silyn
Ar Ragfyr 13 fe aeth yr aelodau i Meifod, Bontnewydd
i gael cinio Twrci blasus a Pwdin Nadolig. Fe roddwyd
anrheg bach i’r aelodau dros sgwrs, paned a mins
peis.
Ar Ragfyr 16 bws yn gadael y ganolfan am 10 o’r
gloch i Landudno, cyrraedd tua 11.30, rhai yn mynd i
siopa a chael cinio, ac eraill yn mynd i Asda am baned
a sgwrs. Pawb yn cyfarfod am 12.15 yn Theatr Gogledd
Cymru i weld pantomeim "Jack and the Beanstalk" a
chyrraedd adref tua 6 o’r gloch.
Trist iawn ydym fel Clwb o golli aelod ffyddlon sef
Mrs Anna Williams. Hoffem ddatgan ein cydymdeimlad â’r
teulu.
[ Yn ôl
i'r Top ]
Hyfforddiant
Os ydych chi fel grwp neu unigolyn â diddordeb
mewn derbyn hyfforddiant gan ddarparwyr yna cysylltwch â Wena
neu Dafydd yn swyddfa’r Bartneriaeth.
[ Yn ôl
i'r Top ]
Dyddiadau Cyfarfod y Bartneriaeth - 2006
Ionawr 9: Canolfan
Llys Llywelyn Nantlle
Chwefror 6: Talysarn
Mawrth 6: Canolfan
Llys Llywelyn Nantlle
Ebrill 3: Talysarn
Mai 8: Canolfan
Llys Llywelyn Nantlle
Mehefin 5: Talysarn
Gorffennaf 3: Canolfan
Llys Llywelyn Nantlle
Medi 4: Talysarn
Hydref 2: Canolfan
Llys Llywelyn Nantlle
Tachwedd 6: Talysarn
Rhagfyr 4: Canolfan
Llys Llywelyn Nantlle
[ Yn ôl
i'r Top ] |
