Cynllun teithio newydd
Crib Nantlle
 Awst 2005
Mae cynllun newydd fydd yn darparu trafnidiaeth
gyhoeddus amgen am bris rhesymol ar gael i bobl sy’n
cerdded Crib Nantlle.
Gyda prinder gwasanaeth bws ar gael i’r rheini
sy’n awyddus i gerdded y daith boblogaidd, penderfynodd Menter
Goriad Gwyrdd Eryri  sefydlu
gwasanaeth tacsi arbennig fydd ar gael i gerddwyr, o
ganol mis Awst 2005.
Yn dilyn ymgynghoriad gyda’r gymuned leol,
Cymdeithas y Cerddwyr a Chlwb
Mynydda Cymru , penderfynwyd y byddai gwasanaeth
tacsi yn darparu modd cynaliadwy ac effeithiol o deithio.
Yn
hytrach na gorfod cael dau gar i gerdded Crib Nantlle,
gallwch bellach barcio eich car, er engraifft, yn Nhalysarn
neu Benygroes, a galw tacsi a fydd yn eich hebrwng i
ddechrau’r daith gerdded yn Rhyd Ddu – a
hynny am bris taith bws o £1 yr un. Bydd Menter
Goriad Gwyrdd Eryri a Bws Gwynedd yn talu am weddill
cost y daith. Bydd y gwasanaeth yma ar gael rhwng Rhyd
Ddu, Talysarn a Phenygroes yn unig.
Mae’r cynllun wedi ei gefnogi gan bartneriaid
Menter Goriad Gwyrdd Eryri, sef Cyngor Gwynedd, Cyngor
Bwrdeistref Sirol Conwy, Asiantaeth Datblygu Cymru, Awdurdod
Parc Cenedlaethol Eryri, Bwrdd Croeso Cymru, a Chyngor
Cefn Gwlad Cymru. Esboniodd y Swyddog Prosiect, Huw Percy:
Rydym yn hapus iawn gyda’r gefnogaeth a roddwyd
i’r cynllun gan y gymuned leol, yn ogystal â chydweithrediad
swyddogion ‘Bws Gwynedd’ sydd wedi gweithio’n
galed i sicrhau fod y cynllun yn llwyddo ac yn symud
ymlaen, a’n helpu i ddarparu dewis o drafnidiaeth
mwy gynaliadwy yn yr ardal.
Ein nod trwy gynllun arbrofol Bws-Tacsi Crib
Nantlle yw darparu modd o deithio sy’n fwy amgylcheddol
gyfeillgar ac yn rhedeg yn ôl y galw ar gyfer y
rhai sy’n awyddus i gerdded Crib Nantlle.
Os fydd yn llwyddiannus bydd y Bartneriaeth
yn ysteried ymestyn y cynllun ar ôl Ebrill, 2006
ac i ardaloedd eraill yng Ngwynedd a Chonwy.
Bydd y cynllun
ar gael i aelodau’r cyhoedd rhwng 7am a 7pm,
drwy ffonio Tacsis Huw o Benygroes ar (01286) 676767
neu 07967 881903.
Am ragor o wybodaeth ynglyn â’r cynllun,
cysylltwch â Huw Percy, Swyddog Prosiect, Menter
Goriad Gwyrdd Eryri, ar (01286) 679615,
neu Trystan Lewis, Bws Gwynedd ar (01286) 679535. |
