1995
Fe gynhaliwyd yr Ŵyl Fai gyntaf yn ôl yn
1995 pan gasglwyd £5,000 i Gangen Gwynedd Gofalwyr
a Dioddefwyr Multiple Scelerosis. Cadeirydd cyntaf
yr Ŵyl oedd Arwyn Roberts, ynghyd ac aelodau'r
pwyllgor gwreiddiol. Un o uchafbwyntiau'r Ŵyl
oedd gem bêl-droed rhwng timau Pobl y Cwm a C'mon
Midffîld, a'r sgôr derfynnol yn 4-4. Yr
oedd llwyddiant y gweithgareddau yn ddigon o ysgogiad
i symud ymlaen i drafod Gŵyl Fai 1996.
1996
Penderfynwyd cefnogi achos clefyd Alzheimer yn 1996.
Cafwyd wythnos fyrlymus o weithgareddau yng nghwmni
enwogion fel Huw Ceredig, Dafydd Iwan a Cefin Roberts.
I gychwyn yr Ŵyl agorodd Banc y Midland ei ddrysau
i'r cyhoedd gael paned a theisen mewn bore coffi arbennig
wedi ei drefnu gan y staff. Daeth y gweithgareddau
i ben gyda chymanfa ganu yng nghapel Bethel MC Penygroes
dan arweiniad Mr Maldwyn Parry. Prynwyd chwe cadair
arbennig i'r uned Alzheimer yng nghartref Plas Gwilym
Penygroes ac anfonwyd cyfraniad ariannol i Ymchwil
Alzheimer Cymru.
1997
Roedd Gŵyl Fai 1997 yn casglu arian i apêl
Asthma yn lleol ac yn genedlaethol. Timau pêl-droed
S4C a BBC Radio Cymru oedd yn brwydro ar gae'r Fêl
y flwyddyn hon gyda sgôr anhygoel o 10-9 i'r
BBC. Roedd y twrnament pêl-droed a phêl-rwyd
i ysgolion cynradd lleol yn hynod o boblogaidd a gwelwyd
cymeriadau go ryfedd yn gwthio gwely o Gaernarfon i
Benygroes! Rhai o sêr yr wythnos oedd John ac
Alun a John Ogwen, gyda Hywel Gwynfryn a Jonsi yn darlledu
yn fyw o Benygroes a phlant bach Ysgol Bro Lleu yn
canu ar y rhaglen.
1998
Yn sicr un o binaclau'r blynyddoedd oedd 1998 pan
ddewisiwyd cefnogi apêl i blant yn dioddef o
gancr sef yr elusen CLIC. Cynhaliwyd gemau rhyng-bentrefol
- Gemau Giamocs - gyda phentref Penygroes yn fuddugol
ac yn ennill y tlws llechen hardd. Mae'r tlws i'w weld
yn ffenetr y Ganolfan Dechnoleg yn Heol y Dŵr,
Penygroes ond ni fu dilyniant i'r gemau wedyn.
Beth am ddod ymlaen i'n helpu i drefnu twrnament eto
er mwyn i'r tlws gael cartref newydd am sbel. Arweinydd
y noson lawen ar y nos Wener oedd Trefor Selway a'r
artistiaid yn cynnwys Hogia'r Wyddfa, Rosalind a Myrddin,
Côr Ysgol Dyffryn Nantlle, Cefin Roberts, Côr
Glanaethwy, Arwel Roberts a Lleisiau Mignedd. Llywydd
y noson oedd y Dr. Alun Morris o Ysbyty Gwynedd.
Mae'n rhaid cofnodi cyfraniad arbennig Gwyn Tudur
i'r Ŵyl y flwyddyn hon - fe gytunodd i redeg Marathon
Llundain a chodi £1,500 trwy ei ymdrechion. Hon
oedd blwyddyn y reid feics gyntaf yr holl ffordd o
Ysbyty Alder Hey Lerpwl i Benygroes ac i gloi'r Ŵyl
cafwyd cymanfa ganu yng Nghapel Bethel Penygroes dan
arweiniad Mr Maldwyn Parri.
1999
Apêl Curiad Calon oedd yr elusen yn 1999 a chychwynwyd
ar y gweithgareddau gyda Sioe Planed Plant ym Mhlas
Silyn. Faint sy'n cofio cyfarfod Wcw, Martin Geraint
a chyflwynwyr Planed Plant S4C ar y diwrnod?
Yn dilyn y gweithgareddau arferol - disgo, drama,
helfa drysor, noson goffi, talwrn y beirdd a twrnament
pêl droed a phêl rwyd i ysgolion y Dyffryn;
cafwyd Noson Lawen mewn neuadd lawn gyda Iona ac Andy,
Topper, Eilir Jones, John Eifion, Adlais a chôr
Ysgol Dyffryn Nantlle.
Cefin Roberts oedd arweinydd y Gymanfa Ganu yng Nghapel
Mawr Talysarn ar y nos Sul olaf. Darlledwyd y Gymanfa
ar raglen Dechrau Canu Dechrau Canmol S4C mis Hydref
1999.
2000
Cytunwyd i gefnogi elusen Meningitis Cymru ym mis
Mai 2000. Roeddem yn hynod o falch pan gytunodd Dr
Sara Webster i fod yn Llywydd yr Ŵyl - nid yn
unig am iddi ddioddef yn enbyd o'r clefyd ond hefyd
gan fod gan deulu Sara gysylltiadau arbennig hefo'r
ardal. Taid Sara oedd yn cadw Siop Dic ym Mhenygroes
ers talwm - y lle gorau yn y byd am hufen iâ cartref!
Yr oedd y Noson Lawen gyda phlant y Dyffryn yn cymeryd
rhan, yn llwyddiannus iawn a'r neuadd eto'n llawn.
Ceren oedd arweinydd y gymanfa ganu ar brynhawn Sul
olaf yr Ŵyl yng Nghapel Saron. |
